ناندیڑ:(تہلکہ نیوز بیورو) 30 جولائی: ممبئی کے علاقائی محکمۂ موسمیات کی جانب سے آج 30 جولائی 2026 کو دوپہر ایک بجے جاری کردہ تازہ موسمی اطلاع کے مطابق ضلع ناندیڑ کے لیے آج شام 4 بجے تک ریڈ الرٹ جاری کیا گیا ہے۔ محکمۂ موسمیات نے ضلع کے مختلف مقامات پر موسلادھار سے انتہائی موسلادھار بارش ہونے کا امکان ظاہر کیا ہے۔اس پیش نظر ضلع کلکٹر راہل کرڈیلے نے تمام متعلقہ سرکاری محکموں کو مکمل چوکس رہنے اور ضروری احتیاطی اقدامات کرنے کی ہدایت دی ہے۔ انہوں نے عوام سے بھی اپیل کی ہے کہ وہ اپنی حفاظت کو ترجیح دیتے ہوئے انتظامیہ کی تمام ہدایات پر سختی سے عمل کریں۔ضلع کلکٹر نے کہا کہ اگر کسی نشیبی پل پر ڈیڑھ سے دو فٹ تک پانی بہہ رہا ہو تو ایسے پل کو پیدل یا کسی بھی گاڑی کے ذریعے عبور کرنے کی ہرگز کوشش نہ کی جائے۔ اسی طرح دریاؤں کے کنارے واقع سیاحتی مقامات پر مقررہ محفوظ حدود سے آگے جانے سے بھی گریز کیا جائے۔انہوں نے مزید خبردار کیا کہ قدرتی آفات کے دوران انتظامیہ کی ہدایات پر عمل کرنا ہر شہری کی ذمہ داری ہے۔ اگر کوئی شخص قواعد کی خلاف ورزی کرتے ہوئے اپنی یا دوسروں کی جان خطرے میں ڈالے گا تو اس کے خلاف پولیس کے ذریعے قانونی اور تعزیری کارروائی کی جائے گی۔ضلع انتظامیہ نے شہریوں سے اپیل کی ہے کہ وہ افواہوں پر ہرگز یقین نہ کریں، صرف سرکاری ذرائع سے جاری ہونے والی اطلاعات اور انتباہات پر اعتماد کریں، اور کسی بھی ہنگامی صورتحال میں انتظامیہ کے ساتھ مکمل تعاون کریں۔
