مہاراشٹر کی سیاست میں بڑا دھماکہ، اُدھو سینا کے 6 ارکانِ پارلیمنٹ نے بنایا الگ گروپ
ممبئی:17؍جون:مہاراشٹر کی سیاست میں گزشتہ چند دنوں سے زیرِ بحث ’’آپریشن ٹائیگر‘‘ آخرکار کامیاب ہو گیا ہے۔ اُدھو ٹھاکرے کی قیادت والی شیو سینا (اُدھو سینا) کے چھ ارکانِ پارلیمنٹ نے پارٹی سے الگ ہو کر اپنا نیا پارلیمانی گروپ تشکیل دے دیا ہے۔
منگل کی رات پیش آنے والی ڈرامائی سیاسی پیش رفت کے دوران یہ تمام چھ ارکانِ پارلیمنٹ دہلی پہنچے، جہاں انہوں نے لوک سبھا اسپیکر سے ملاقات کر کے الگ گروپ بنانے کی باضابطہ کارروائی مکمل کی۔ بعد ازاں اسپیکر نے بھی اس نئے گروپ کو باضابطہ منظوری دے دی۔
الگ گروپ میں شامل 6 ارکانِ پارلیمنٹ
2024 کے لوک سبھا انتخابات میں اُدھو سینا کے 9 ارکانِ پارلیمنٹ کامیاب ہوئے تھے، جن میں سے اب 6 نے علیحدہ راستہ اختیار کر لیا ہے۔ ان میں درج ذیل نام شامل ہیں:
سنجے جادھو (پربھنی)،ناگیش پاٹل آشتیکر (ہنگولی)،سنجے دیشمکھ (ایوت مال-واشیم)،بھاؤ صاحب واکچورے (شرڈی)،سنجے دینا پاٹل (شمال مشرقی ممبئی)،اوم راجے نمبالکر (دھاراشیو)
آگے کا سیاسی لائحۂ عمل
سیاسی حلقوں میں قیاس آرائیاں جاری ہیں کہ پارٹی سے الگ ہونے والے یہ چھ ارکانِ پارلیمنٹ 19 جون کو شیو سینا کے یومِ تاسیس کے موقع پر ایکناتھ شندے کی قیادت والی شیو سینا میں باضابطہ شمولیت اختیار کر سکتے ہیں۔
اُدھو سینا کی اسپیکر سے اپیل
دوسری جانب اُدھو سینا کے ساتھ رہنے والے ارکانِ پارلیمنٹ اروند ساونت، انیل دیسائی اور راجا بھاؤ وازے نے سنجے راؤت کے ہمراہ لوک سبھا اسپیکر اوم برلا سے ملاقات کی۔ اس موقع پر انہوں نے مطالبہ کیا کہ منحرف ارکانِ پارلیمنٹ کے گروپ کو الگ پارلیمانی گروپ کے طور پر منظوری نہ دی جائے۔
اس سیاسی پیش رفت نے مہاراشٹر کی سیاست میں ایک نئی ہلچل پیدا کر دی ہے اور آنے والے دنوں میں مزید اہم تبدیلیوں کے امکانات ظاہر کیے جا رہے ہیں۔
